نصائح جربتها ونفعاتني و طيابي ولى بنين
16 يونيو, 2014 حلول منزلية

السلام عليكم أخواتي:
حبيت نحط هد الموضوع عسى تستافدو منو حتى نتوما ومافيها باس حتى للي جربات شي نصيحة تحطها لينا نتقاسمو الافادة .
نبدا ان شاء الله :
1-باش الرفيسة تجي بنينة زيدي فيها كركوبة ديال الثومة بلا متقشريها كتعطيها لدة هائلة.

2-ملي نطيبو الدجاج محمر وباش المرقة تجي معسلة ومدغمرة زيدي قطرات الخل فالطنجرة ونتي كتحكي قاع الطنجرة بمغرفة العود متجي المرقة معلكة وغزالة .

3-ملي نبغو نطيبو اللوبيا البيضا نضيفو 3 وريقات ازير كتجي لديدة ومكضرش مالين المعدة .

4- ملي كنكون كنطيب المسمن او الملوي ديال المقلة فقط المرة الاولى فاش كنرش المقلة بالزيت وغي نرمي المسمنة نرشها ونقلبه ونبقا نقلب ونشقلب هههه هدا هو السر باش كيجي مورق ومحلول وناشفة من الايدام كيجي غزال ولديد وراجلي مبقاش باغي يشري ديال الزنقة هههه.

5- ملي نكون نقلي الحوت كندوزو فالطحين وفالما باش ميطلقش الطحين فالزيت.

6-باش الكيك ميلصقش لينا كندهن المول بالزيت والطحين وندخلو للكونجلاتور عاد نحضر الكيكة ملي كطيب ونزولها كيبقى المول نقي ومفيه حتى فرتيتة ومرات الى كانت الكيكة ديالي عادية كندهن المول بالزيت ونرش الكوك مطحون فبلاصة الطحين ملي كطيب الكيكة كيتحمر داك لكوك وكيعطيني نسمة غزالة اما الى كانت الكيكة ديالي كحلة كندهن المول ونرش الكاكاو باش متجينيش الكيكة شهبة من التحت.
7- وإلا بغيت الكيكة تجيني خفيفة بحال ديال الجنواز كنزيد فالخليط كاس ما سخون ونا كنطرب كتجي هشيشة وعالية وخ كندير فيها غي 2 بيضات والدقيق ضروري مغربل 2 مرات وكندخلها لفران بارد كتجي روعة.

8-الحريرة الى بغيتي يشموها الجيران ولكن عنداك مدوقيهمش ههههه ديري مع القوام للي موالفة راس معلقة صغيرة ديال الكمون وراس معلقة صغيرة ديال القرفة متكتريش كتجي روعة ومداق لديد.

9-ادا بغيتو الكريصات او اي معجنات يجيو بحال القطن يعني رطبين خلي العجين تخمر و فين ما تبان ليك طلعات هبطيها بايدك و هكدا شي ثلاتة المرات و في الأخير خليها تخمر شوية و شكليها عاد خليها تخمر تاني و دخليها الفرن كيجيو هائلين.

10- ملي نبغي نغسل الدجاج باش نحيد كاع الدم للي كيكون فالجوف ديال الدجاجة كنرقدها فالما والهريسة تكون شوي كتيرة ونخليها واحد المدة حتى كطلق كاع الريوك ومن بعد نحكها بالملحة والحامض وسكنجبير كتولي كتشعل.

11- باش تجي الماكلة بنينة كنزيد معلقة ديال الهريسة فاللحم والدجاج وسكسو.

12- وهدي للي حمقاتني كنعمل فقرعة الهريسة حتى لنص ونكمل عليها فالزيت البلدية وندير القرعة فالبان ماري على عافية مهيلة مدة نص ساعة كل نهار مدة 3 ايام ملي نكمل 3 ايام نخبي القرعة 7 ايام فمكان مظلم ونبقى من بعد ندير بيها مساج صالحة للبرد فالمفاصل والروماتيزم و أنا كان كيضرني عنقي الى كترت القعدة فالبيسي او ماكينة الخياطة غي ندهن عنقي وندير شال سخون ونحس بالراحة اوا طهلاو فلالة الهريسة ههههه..

في أمان الله مع أسرار أخرى.

 

اترك تعليقاً