جديد اسرار الطبخ جديدة ورائعة
6 يونيو, 2014 حلول منزلية

اليوم جبت ليكم اسرار جداد نتمنى تقبلوها مني غالياتي.

سري هو وعنداكم تقولوه لشي واحد هههه:
انا كنزيد باكية ديال كاوبيل في سلو وكيعطي بنة غزالة كنت محتافظة بيه ولكن حيت انتما عزاز عطيتو ليكم

سري فالمسمن :
هو كضيفي معلقة العسل للعجين باش كيجي محمر ومورق

سري فسلو تاني:
هو كضفي شكلاط ماروخا كيعطيه البنة

الى بغيتي تسقي البسبوسة :

ومكانش عندك الوقت باش ديري السيرو او معندكش الليمون فالدار:
سقيها بهواي ولا فانتا كتجي غزالة ومداق رائع

باش تجيك بطاطا مقلية فيها بنة خاصة لوحي فالمقلة القلي :
2 ضريسات تومة منقيين

باش يجيك الكيك زوين ومنفخ:
ديما فاش تبغي تكبيه فالمول علي يديك مزيان وعاد كبيه باش يدخل له الهواء الكافي

الابغيتي كريصات السردين يجيو بنان:
وماناشفينش ديري معاهم بطاطا مسلوقة ومطحونة

انني ملي كنكون كنطلع لاكريم ديال الدار:
كنزيد معاه كراميل عادي سكر مذوب باش كتيبس وكتطلعلي قاصحة وكتطلع بسرعة

انني فالبيتزا:
باش كيجيلي الجبن بالخيوط فالبيتزا كنجيب جبن عادي ونذوبو مع الحليب ونكوبو فالبيتزا كتجي بيتزا ملي كتقطعيها بالخيوط

فاش كندير الروز بالحليب :
كنزيد عليه فالاخير ياغورت طبيعي وشوية سكر ونخلط مزيان كيجي خااااتر ومداق غزااال

الحوت منين تشرميله:
ديما حكي فيه شوية زعتر يابس كيعطي بنة رائعة

فاش كطيبي اللوبيا:
ديري طرف ديال الحامض مصير فاللوبيا ملي طيبيها كتجي بنينة.

اترك تعليقاً