أفكار رائعة لمشكل الفطور مع ولادنا

28 مايو 2014

كلنا كأمهات عندنا مشكل ديال الفطور مع ولادنا الاغلبية ما تيبغيش يفطر و وخ تزوقي و تتفنني ما كتلقايش تجاوب المعيدة ديال وليدك مع داك الفطور و حتى لقيتيه كتجيك صعيبة كل صباح تبذلي مجهود باش مولاي السلطان أو للالة الاميرة تفطر.
نعطيك شي وصفات خفيفة ظريفو نفعاتني مع وليداتي و نفعاتني مع راسي هو الاول ههههههه
أول حاجة يالحبيبة غتنوضي تعجني واحد الطريح ديال الخبز دالزرع او بطبوط اللي حبيتي و يكون كثير شي عشرة او اكثر اللي قديتي عليه ولكن ديريهم بأحجام صغيرة باش تجي حلوة في المنظر و ما يبقاش ليك نص الخبزة ما موكولش و يكرم و تضيعي فيه و تخبيه في الكونجيلاتور كل صباح تسخني وحيدة لكل واحد في الة البانيني او الميكرو اوند او الفران ديالك.
غتديري زويتة بلدية في قريعة زوينة و أنيقة و تشدي زعتر و تطحنيه و تشدي الجنجلان صحيح و شوية هيل أخضر مطحون و تخلطيهم فشي قريعة صغيرة و انيقة.
و تشدي زبيدة تخليها ترخي راسها برا الثلاجة و تعمري بيها جيب الحلواني و تشدي طبيسيل ابيض و مفطح و متوسط الحجم و تديري وريدات بديك الزبيدة في جناب الطبسيل و في الوسط ، و تاخدي مربى الفريز او الليمون او الحامض او المشماش المهم المربي اللي كتاكلو و تيعجبكم و تدوريه بدوك الوريدات ديال الزبيدة .
و تاخد الفرماج كيري و زيدي عليه الزيتون الاسود او الاخضر اللي مفضل عندك أكثر و شوية دالزيت البلدية و قبصة زعتر مطحون و ديري كلشي في مولينكس حتى يتجانس الخليط و تولي عندك كريمة و خبيها فشي بواط صغيرة و انيقة.
و الا كانوا ولادك من محبي الفرماج ما تشريش نوع واحد شري انواع مخلطة و بالوان متنوعة و حيديهم من الكارطونة ديالهم و حطيهم فشي طبسيل ابيض و انيق و خليهم فيه و دخليهم للثلاجة هكاك.
و خوذي زليفة صغيرة بيضة و حطي فيها عسيلة و ضروري ما تأكدي على وليداتك ياخدوا معلقة صغيرة منه او يديروه مع الفرماج ولا الزبدة في الخبيز و لا حلي ليهم الحليب بمعلقة منه حيت فوائده كثيرة وماشي بالضرورة يكون العسل الحر الغالي خودي غير ديال الليمون او الكاليبتوس اللي متوفر في الاسواق و ثمنه معقول.
و تعودي ديما تفطريهم بالحليب حيت أتاي في الصباح خايب على المعدة خاوية تيفقدهم بزاف دالفيتامينات و تيدير ليهم هبوط ماشي بحال الحليب او القهوة تيعطيهم نشاط و حيوية و يا ريت لو تعصري شي لويمنات و تخليهم في الثلاجة و تحطيه حتى هو في الصباح.
و الا حيدتي شوية دالعجز صلقي في الليل شي بيضات و في الصباح زوقي بيهم الطبيلة ديالك.
و الا كانوا وليداتك تيبغيوا يديوا معاهم الكوتي بعدي على دوك البيسكويات راه غير تيخربوا اجسام وليداتك و يضعفو ليهم الذاكرة و يهبطوا مستوى الذكاء و تيسببوا فقر الدم ناهيك على الامراض الخطيرة الاخرى.
صنعي الكوتي بايدك في الدار ، خودي مقادير من موقع مولاة الدار ديال بيسكوي عادي و تفنني فيه : طبعيه بأشكال زوينة نجميات قلبيات وجوه انصاف دوائر و زوقيهم بالشكلاط الملون و العادي و خودي دوك الكويغطات البويض المتوسطين بحال اللي تيكونو في المخبزات و خليهم عندك في الدار منين يكون ولدك خارج عمريه ليه بالبيسكوي ديالك و عطيه ليه بلا ما يعرف انك انتي اللي صاوبتيه غيسحابه ديال الزنقة.
و نصيحة للامهات اللي وليداتهم تيتغداو في المدرسة حاولو ما تعتمدوش على غدا المدرسة اللي تيجيبوه ليهم من عند الممون راه كله امراض و طريقة الطهي غير صحية بالمرة و ما مراقباش ، و ما تعكزيش عليه و تخربقي عليه شي سندويتش و تلوحيه ليه في ميكة و صافي لالالالالالالالالالالالالالالالالا حاولي تديري ليه خضيرة مبخرة و معاها الصوص اللي كيبغي هو ترافقيها بلحيمة مشوية او فخض دجاج مقلي او مبخر او حوتة مشوية او كبيدة او قليب و تعطيه الديسير دياله يا اما يوغورت او فاكهة تيبيغها هو و العصير يكون ديال الدار ماشي مصنع و الخبز حتى هو تكون عاجناه انتي ولا شارياه من مخبزة موثوق فيها و يستحسن يكون الخبز الاسمر ماشي الابيض.
نتمنى أفكاري ينالو إعجابكم و الله يحفظ لكم و ليداتكم و و ليدات المسلمين جميعا.